በስመ አብ ወወልድ ወመንፈስ ቅዱስ አሐዱ አምላክ አሜን።
“እነሆ ለሕዝቡ ሁሉ የሚሆን ታላቅ ደስታ የምሥራች እነግራችኋለሁ፤ ዛሬ በዳዊት ከተማ መድኃኒት እርሱም ክርስቶስ ጌታ የሆነ ተወልዶላችኋልና!” (ሉቃ. 2፥10-11)
ከሁሉ አስቀድሞ የሰው ልጅን ለማዳን በሰውነቱ ተገልጦ ብርሃነ ልደቱን እንድናይ፤ በዚችም ዕለት ቅዱስ በዓሉን በሰላም እንድናከብር የፈቀደልን የአባቶቻችን አምላክ የልዑል እግዚአብሔር ስም የተመሰገነ ይሁን።
ይህን በዓል የምታከብሩ ኢትዮጵያውያንና ኢትዮጵያዊት በሙሉ፤ እንኳን ለጌታችን ለመድኃኒታችን ለኢየሱስ ክርስቶስ የልደት በዓል በሰላም አደረሳችሁ!
የጌታችን የኢየሱስ ክርስቶስ ልደት የምሥጢራት ሁሉ መጀመሪያ ነው። የሰው ልጅ ከአምላኩ ተለይቶ በጨለማ ውስጥ በኖረበት ወቅት፤ አምላክ የሰውን ልጅ ፍለጋ ወደ ምድር መጣ። ይህ ልደት የማይታየው አምላክ የታየበት፣ የማይዳሰሰው የተዳሰሰበት ታላቅ ክስተት ነው።
ጌታችን በቤተልሔም በረት በድንግል ማርያም እቅፍ ውስጥ ሆኖ ዓለሙን በእጁ ደገፈ። ይህም የክርስቶስ ልደት በሰማይና በምድር፤ በመላእክትና በሰው መካከል የነበረውን የጥል ግድግዳ አፍርሶ አንድነትን የፈጠረ መሆኑን ያሳየናል። ሰማይ ወደ ምድር ወረደች፤ ምድርም ወደ ሰማይ ከፍ አለች።
ክርስቶስ የመጣው ዕርቅን ሊመሰርት ነው። በመሆኑም ልጆቻችን የዕርቅና የፍቅር ፍሬዎችን ልናፈራ ይገባል። ይህንን የተቀደሰ በዓል ስናከብር ሰላም ከሁሉ በላይ የሚያስፈልገን ስጦታ እንደመሆኑ መጠን፤ እኛም በመካከላችን ያለውን አለመግባባት በይቅርታና በውይይት መፍታት ይኖርብናል።
በተጨማሪም በዓሉን ስናከብር በዙሪያችን ያሉትን የተቸገሩ ወገኖች ማሰብ ሃይማኖታዊ ግዴታችን ነው። የታረዙትን በማልበስ፤ የተራቡትን በማብላት፤ የታሰሩትን በመጎብኘትና በመጠየቅ ሊሆን ይገባል።
አምላከ ቅዱሳን እግዚአብሔር ይህንን የልደት በዓል የደስታ፣ የጤና፣ የበረከትና የፍጹም ሰላም ያድርግልን።
ወስብሐት ለእግዚአብሔር። አሜን።
Administration & Contact
- Administrator: Melake Selam Aba G/Michael G/Kidane (Komoss), The Church Administrator (መልአከ ሰላም አባ ገ/ሚካኤል ገ/ኪዳን (ቆሞስ) የደብሩ ዋና አስተዳዳሪ)
- Scripture Quote: “Michael, one of the chief princes, came to help me – Daniel 10:13” (ከዋነኞቹ አለቆች አንዱ ሚካኤል ሊረዳኝ መጣ – ዳን 10፥13)
- Website: www.stmichaeleotc.com
- Email: info@stmichaeleotc.com
- Phone: +1 (510) 230-3071
- Social Media: @St.MichaelEOTC